Luke 2

Máríyaa Ísumba maránkarain-kwasai.

Mátíyu 1:18-25

1minkánáávímbá Árómáani-kamaani-anondako áwíꞋa Ógásitasi kwemá simátimena séna amápaꞋ-marava-kwaasi túwíꞋa agayánááowe siráiye. 2aivaꞋá túwíꞋo agayón-kanaavimba Sáíriniyasi Síriyaa-kwaasiti kawáánákó máyón-kanaavimba 3namupaꞋó maivá kuráawai koyauwerésa kentí akúmbó máyópaꞋa túwíꞋa agayáíyantavesa tiráawe. 4Yósépi Tévítin-andaraken-kwaasi póna Káríri-maravaꞋa Násáreti-naopaꞋa tuwéna Yútiyaa-maravaꞋa Tévítina naaópaꞋa téna mindáó-kwiꞋa PétáremuvaꞋa túwana 5awainínkó-árásígó Máríyaa ámúkwariꞋa úwana áwíꞋa mayáíndayavena áíꞋmaena túwana 6mindáópaꞋa ména iyámpóímo ankáí-kánáá túwana 7aivar-íyámpóí marankéna iyámpóígona unáánkwátói úsúrena purumakankóná táávepimba ánkaraiye. túwíꞋa kwéagayowasa sáwíva-kwaasi kwirómpimba kwaásimo kwááyumo kwáén-daumpaꞋa íma ména purumakankóná naaúmpaꞋa ména maránkaraiye.

sipisípiraꞋo tavíkówai simátímakain-kwasai.

8mimbápáꞋá sipisípiraꞋo tavíkówai noꞋwáámba uváꞋá kwégawaa-esa máyówana 9Ísóigo kwená kwayóꞋnáꞋá kwíyómpakemba aiꞋmarówana sipisípiraꞋo tavíkówaitopaꞋa paárúwana Áánútuna ságayamba tuwówana kumúwasa awánésa ávááraumai táátavesa uwaná 10kwíyómpakewai séna íma tááꞋa kaíno. áséi-kwasai kusimátimunda pósa sáwíva-kwaasi kwéisesa ávááraumai aamoí umánkanaaowe. 11ívéꞋa Tévítina naaópaꞋa iyámpói maránkáísana miníyámpóígóntávésa Áánútu usásinankaiwai Ísóigoman-iye sénááowe. miníyámpóígó keináraware óꞋon-kwaasiye sáwíꞋo umáímo máyáampinkemba kawer-ámpáꞋá métinkaniye. 12miníyámpóímá ampantanéí úsúmai purumakankóná táávepimba máráísaꞋa koawánéꞋa séꞋa simásímakain-aimba árair-aimba kentáá kawer-ámpáꞋá mésinkaniwaimba maránkaraiye sénááowe súwasa 13avekáámbá kwíyómpakendarawaꞋa sáwívaꞋa paárésa Áánútu áwíꞋa mósá marésa sésa 14kwíyómpaꞋa Áánútu áwíꞋa mósá maráúmne. marapáꞋá Áánútu aamoí umátínkáin-kwaasi paru umái máyáawe siráawe.

sipisípiraꞋo tavíkówai Ísumba koawánaraan-kwasai.

15kwíyómpakendarawaꞋa kwíyómpaꞋa kuntauwerésa íyúwasa sipisípiraꞋo tavíkówai sésa Ísóigo simásímakain-kwasaiyaveta PétáremuvaꞋa koawánanaisaiye sésa 16avekáán-umai kumbá Máríyaae Yósépiye mésarai purumakankóná táávepimba Ísumba ánkaroyamba taawánésa 17kwíyómpakewai sirón-kwasai miníyámpóígóná kwaasái tasimátimesa 18koyauwerésa simásímakain-ainta árair-aine sésa ísaron-aintavesa koawánontavesa Áánútu áwíꞋa mósá makáawe. sipisípiraꞋo tavíkówai simátimun-aimba ísówai imáyáa uwaná Máríyaa mináímbá áákar-aakaꞋa éna imáyáa uráiye.

Ísu áwíꞋa tamámakain-kwasai.

21iyámpói ánkáyuwena avakaumboé-noꞋwaamba kwaúwasa miníyámpóígó áúraꞋa kárámai araaꞋéna uwaná áwíꞋa tamánkena anówamo ímo ámúkwariꞋo urónkaꞋa kwíyómpakewai sirón-kwiꞋa tamánkena Ísuwe siráiye.

Símiyoniye Ánaae Ísumba awánaraayan-kwasai.

22naaóváꞋá Mósesi aaraimó iyámpóímo tinkésa nombó pétuwesa miwítí naaópaꞋo iyónááon-aimbo siráin-kanaa túwasarai Yósépi Máríyaae Ísumba áíꞋmesarai Ísóigombo amíyanesarai Yérúsaremu-naopaꞋa kurááiye. 23Ísóigona ámáámba Mósesi agaimaréna séna Ísóigo séna kentí iyámpói aivaꞋá inaamai-íyámpóíyómbá tíꞋmaeꞋa kesópaꞋa mátinkeꞋa ená iyámpóíye sénááowe Ísóigo siráiye Mósesi agaimaréna siráiye. 24moórávaꞋa Ísóigona ámáámba agaimaréna séna Áánútuntavekai ísámai máái-numa kaeꞋá vamái agáyáákaiyo. ímo mááimo makékai mááiraan-dumago árááꞋa kaeꞋá maimái agáyáákaiyo siráiye. mináímbá mirá óyááoiyantavesarai Ísumba áíꞋmesarai Yérúsaremu-naopaꞋa kurááiye.

25kuyaná moóráwai áwíꞋa Símiyoni kwemá YérúsaremuvaꞋa ména kawe-kwáásí póna Áánútun-aaiyavena asiramái ména Ísareri-kwaasi kaweꞋá umátinkaniwaimba amuꞋmaréna máyowana Áánútun-amanko kwesé ména 26ááéma simámena séna íma ááéma puwíníyompo Ísóigomo usásinankaiwaimba awáné puwíníyone simámakaimba 27Áánútun-amanko imáyáa amúwana anóm-bonoꞋ-naumpaꞋa umáyowasarai Ísu anóvowi ámáámba mirá siróntavesarai Ísumba áíꞋmaesarai anóm-bonoꞋ-naumpaꞋa íyúyana 28Símiyoni miníyámpóí tapéna Áánútuntavena súwi simásuwena séna 29Ísóigoo simásímakaanda-aimba ívéꞋa paárisana sirunkó kaweꞋá kwéimba póꞋa úwoi puwónaumne. 30amápa-kwaasiyavai ísámai kawer-ámpáꞋó métinkaniwaimba usásinankaanaꞋa áꞋa kwéawanaumne. 32óꞋonkaa-kwaasi sáma kamátinkena kawer-ámbá agaráátinkainana póna Ísareri-kwaasi súwíta iyíníye Símiyoni siráiye.

33Símiyoni miníyámpóígóntávéna súwasarai anóvowi isésarai anón-imayaa uyaná 34Símiyoni séna Áánútu kaweꞋá umátinkaniye simásuwena miníyámpóígó anówantavena séna Áánútu maaníyámpóí usásinankaiye. kwentávésa Ísareri-kwaasi évakarawai Áánútuntavesa kaweꞋá umái méwasa évakarawai tínaaemba umámenaaowe. Áánútu kwembá awaamékáámbá umánkáísasa sáwí-aimbo simánkanaaowaiti 35sáwí-imayaa amápa-kwaasi túrankaꞋa paáriniye. ááigwara-tantaako airáráísanamo áíꞋo intenkáámbá umbai-yántááꞋá enarumpimbá tíníye Símiyoni Máríyaantavena siráiye.

36moórá-ininko áwíꞋa Ánaa kwemá Áánútun-aai simátímakon-ininko ména Ásan-andaraken-inimba Vániyueri ayáámúnko póna kwaaí mairéna avakaeté-ima maisuwówana awaikó puwúwana ayáátáákaꞋa 84 ima maisuwéna áráankamba kéna aasiyaasi-táwai anóm-bonoꞋ-naumpaꞋa uména enónkaꞋa aaváyaavimba noꞋwáámba Áánútu áwíꞋa mósá kwémarena námúnaawe suꞋmai síndayavena íma toómbá kwénena 38Símiyoni kwésun-tawai kwegwáráꞋá egwaaꞋá taména Áánútuntavena súwi séna miníyámpóígón-áái simátimena Áánútu Yérúsaremuvaken-kwaasi sáwí-imayaao tátokaimpinkemba iyásinkaindavenaya sirániwaimba kwéamuꞋmaraundawaintavena miníyámpóígón-áái simátímakaiye.

Yósépiye Máríyaae Násáreti-naopaꞋa kurááyan-kwasai.

39Yósépiye Máríyaae Ísóigo siráin-amaamba ánásamasuwesarai Káríri-maravaꞋa mindáraiti naaópaꞋa Násáreti-naopaꞋa komáyóyana 40mindáraiti iyámpóígo anón-umagwena asiramái ména kawer-ímáyáá kwéuwana Áánútu kaweꞋá kwéumankowana méraiye.

Ísu iyámpói maúnkaꞋa anóm-bonoꞋ-naumpaꞋa iráin-kwasai.

41naaóváꞋá Áánútu Yútaa-kwaasi tíyótaasa í-tánón-kánáá túntemba Ísu anóvowi Yérúsaremu-naopaꞋa kóyo urááiye. 42Ísu sísamaivakemba kaeꞋá kumbaimái-ima maisukónkaꞋa kóyo uyambá pósarai mintánómbá nayááoiyantavesarai Ísumba áíꞋmaesarai YérúsaremuvaꞋa komáyóyana 43mintánón-kánáá ánásowasa miwítí naaópaꞋa kóyáwé uwaná Ísu YérúsaremuvaꞋa máyowasarai anóvowi íma awánésarai 44imáyáa ésarai kwenamááraewa aampaꞋá kwégwiyo-imayaa ésarai aampaꞋá kwégwesarai enónkaꞋa kwétoyo uwasaráí mindárai miwítí naaóraavimba timááraavimba tíndawe sésarai avakáá uyambá 45íma awánésarai avakáá uwááesarai óꞋa tayauwerésarai YérúsaremuvaꞋa koavakáá úmaesarai kuyambá 46kaumbo-táwai ánásowana anóm-bonoꞋ-naumpaꞋa máyowasarai anóvowi awánaraaiye. Yútaa-kwaasi aaimó simátímún-kwaasiti avumpimbá Ísu ména miwí táái kwéisena mináíntávéna tísaa úwasa 47anondá kwembá áísaa uwaná kwená kawer-ímáyáávínkémbá simátimuwasa isésa táátavai uwasaráí 48anóvowi taawánésarai táátavai ésarai tiyáámba tuvimpínésarai anówama séna kesááninkoo enavowé kesé avakáá úmaekai kwénaauyana sirunkó umbaí kwétaivo nóra éwa mirá kwéono súwana 49Ísu séna nóra ékai sivakáá kwéoyo. kesivoná naaúmpaꞋa máyaumpo nóra ékai íma ísaraaiyo súwasarai 50mináínkóná ááimba íma kaweꞋá umái ísaraaiye.

51íma ísóyana Ísu anóvowiye Yérúsaremuvakemba Násáreti-naopaꞋa téna miwí tááiyavena kató úmae kwéiyena tamáyowana anówama Ísumo uráimba imáyáa umái máyowana 52Ísu anón-umagwena kawer-ímáyáá kwéuwasa Áánútugwara kwaásigwaraꞋa aamoí umánkaraawe.